احيانا و انا ماشي بسوق مكتظ بالباعة و البضاعة و هواة الشوبينغ ... بينابني بعض الشعور باني واحد من المساهمين بطفرة السوق ..
و يمكن اكون احدى المؤسسين اللا معلنين للازمة المالية العالمية اللي فارشة ظلالها على كل البلدان .
و انا مشي بتطلع على اي شي مناسب بيتناسب مع ثلاجتي الواقفة بمطبخ البيت متل اي مخلوقة هبلة واقفة و مستنية شي عريس .
مصيبتي الكبيرة اني ما بحبذ اي شي مو منظف او مطبوخ على ايد المدام ....
اكل الفطائر عندي مرفوض مع اني لما بكون معدي بجبن خباز الفطائر المعجنة و المليئة بالخمير كتير بكون مهموم على جهد الخباز و عرقو الزاخخ خاصة يايام قيظ الصيف الحار ... مع هيك بحس هالمظلوم انو مالو حظ مني لا من بعيد و لا من قريب ؟؟
بياع الفروج ما بعتب قدام محلو .. و مو بس هيك ... قبل ما المح قارمة مكتوب عليها تشيكن بمية متر بعطي ايعاذ لاقدامي انها تقطع الطريق للرصيف التاني او اغير كل الوجهة ..
المرتديللا .. و اعوذ بالله من كلمة مرتيدللا ... لما بتذكر هالكلمة .. قبل كل شي بيتبادر لذهني العربة المتوسطة اللي مرسوم عليها علب المرتديللا بمختلف الاحجام .. هاي غير دعاية اصغر علبة ..الدعاية المفروشة على جنبات السيارة و الكتوب بالخط المزركش الطاقة .. كل الطاقة ب 30 ل س
بايام رمضان السوس ممنوع من الصرف ببيتي .. صحيح السوس نضيف و نقي و المي ماشي الحال .. بس البرميل .. اه من البرميل لو تعرفو وين بيكون قبل شهر الصوم .
المعروك المكشوف .. نو نو نو نو .. العياذ بالله ...بستغرب لما الناس بتتكوم لتاخدلها شي معروكة منشورة على الرصيف العاري
.
الجيل .. جيل الشعر ما بستعملو مع اني مو اصلع ( عفوا من صلعان الملتقى ) ان وجدو .
عند الحلاق ما بحلق دقني . .. لانو عندو موس نووي متخرج من مفاعل نطنز .
سيديات منسوخة ما بشتري .. حفاظا على الملكية الادبية و الفكرية ...
كتب ما عاد اشتري لانو الكتب اللي ممكن تقرأ ما في منها بالمكتبات .
يعني بالكردي .. انا ما بعرف اشتري شي من السوق الا اذا كان نيئ او مقبول المواصفات عندي حالة قرف من كل شي جاهز على ايدي خفية و غريبة ...
و رغم اني رضيان عن ادائي بالانتقاء ... ما بيحز شي بنفسي الا اصحاب المحلات اللي فاتحين باب رزقهون ليعيشو ... بينما واحد متلي بيدخل لعندهون بعدد المرات اللي بيدخل فيها انسان بلدي لمتحف المدينة .. بالعمر مرة او مرتين ...
انا مو من دعاة يكترو امثالي اكيد .. لانو هالشي لو تطبق .. ما اممكن حدا منكون يشوف الفوا ل الصبح عمبيمشي طابور طويل ..
لا و ممكن حدا منكون يشوف بائع او تاجر ايا كان عمبيبتسم او يضحك حتى لو قدمتولو رغيف سخن .
بيروزفان
